నామ రామాయణము
నామ రామాయణము భారత రత్న సుబ్బలక్ష్మి గారి అతి మధురమైన గాత్రం నుండి అమృతంలాగా వెలువడే నామ రామాయణం మనందరికీ మనసు పులకింప చేస్తుంది. గానంతో పాటుగా అర్ధం కూడా తెలుసుకుంటే దివ్యమైన అనుభూతిని కలిగిస్తుంది. ఈ గాన కావ్యానికి అర్ధం తెలియ చెప్పే ప్రయత్నము ఇది. ముందు చరణం, ప్రతిపదార్థము, తాత్పర్యము ఇచ్చాను. ఇచ్చిన అర్ధము తప్పనిపించినా లేక సరి అయిన అర్ధము కాకున్నా, క్రింద వ్యాఖ్య చెయ్య గలరు. బాలకాండము : (ఈ రామాయణములోని ప్రతి నామమూ 'రామ' అన్న పాదముతో సంపూర్ణం అవుతుంది. పునరుక్తి దోషం లేకుండ 'రామ' అన్న పదము ఆ కోదండ రాముని సూచిస్తుందని తెలుసుకొన గలరు.) శుద్దబ్రహ్మ పరాత్పర రామ | కాలాత్మక పరమేశ్వర రామ | శుద్దబ్రహ్మ = పరబ్రహ్మ (నిర్గుణ రూపము మించిన శుద్ధత లేదు), పరాత్పర= పరాత్ + పర = పరముని మించిన పరము= అన్నింటిని మించినది. పరం అంటేనే అత్యున్నతం, దాన్ని మించి ఏమీ లేదని కదా. మరి పరాత్పరం ఏమిటి? కాలాత్మక = కాలభ్రమణానికి మూలమైన; పరమేశ్వర= ఈశ్వరులలో పరమయిన [మళ్ళీ పరబ్రహ్మ అన్న సూచన] శేషతల్ప సుఖ నిద్రిత రామ, బ్రహ్మత్ అమర ప్రార్ధిత రామ శేషతల్ప= ఆదిశేషుని పరుప...